सुनसरीमा शुक्रबार ३८ जना नयाँ कोरोना संक्रमित थपिएका छन् । संक्रमण पुष्टि भएकामध्ये १६ जना प्रहरी, २ जना नेपाली सेना पनि छन् । सुनसरीमा बिहीबार मात्र ३१ जना कोरोना संक्रमित थपिएका थिए ।
सुनसरीको इनरुवास्थित स्वास्थ्य कार्यालय अधिकृत दिक्षा श्रेष्ठका अनुसार थपिएका कोरोना संक्रमितमा ५ जना महिला प्रहरीसहित १३ जना जिल्ला प्रहरी कार्यालयमा कार्यरत प्रहरी हुन् भने २ जना नेपाली सेना धरानको फुश्रेस्थित कार्यरत सेना हुन् ।
श्रेष्ठका अनसार थपिएका संक्रमितहरुमा इटहरी उपमहानगरका ५ जना, देवानगञ्ज गाउँपालिकाका ४ जना, कोसी गाउँपालिकामा ३ जना, इनरुवा नगरपालिका १ जना र धरानमा १ जना नर्स, बीपी कोइराला स्वास्थ्य विज्ञान प्रतिष्ठानका कर्मचारीका छोरीसहित ५ जना रहेका छन् ।
स्वास्थ्य कार्यालयकाअनुसार सुनसरीमा कोरोना संक्रमितको संख्या ५ सय ७७ पुगेको छ । २ सय ३५ जना कोरोना संक्रमणबाट निको भएका छन् । बाँकी संक्रमितमध्ये लक्षण नदेखिएका र देखिएपनि गम्भीर समस्या नभएकाहरु आइसोलेसन, होम आइसोलेसनमा रहेका छन् भने लक्षण देखिएका गम्भीर समस्या भएकाहरु बीपी कोइराला स्वास्थ्य विज्ञान प्रतिष्ठानको कोभिड अस्पतालमा उपचाररत रहेका छन् ।
Copyright © 2019 / 2026 - Junkirikhabar.com All rights reserved
