प्रदेश १ मा फैलँदो कोभिड १९ संक्रमणसँगै मृत्यु पनि बढ्दो छ । पछिल्लो एक सातामा प्रदेश १ मा ५६ जना संक्रमितको ज्यान गएको छ ।
प्रदेश १ सामाजिक विकास मन्त्रालयका अनुसार प्रदेशमा १६ कात्तिकमा ४ जना, १७ र १८ कात्तिकमा ५–५ जनाको मृत्यु भएको छ ।
१९ कात्तिकमा १४ जनाको ज्यान गएको छ । २० कात्तिकमा ९ जनाले ज्यान गुमाएका थिए । २१ कात्तिकमा १२, २२ कात्तिकमा ५ र २३ कात्तिकमा २ जनाको मृत्यु भएको प्रदेश १ सामाजिक विकास मन्त्रालयले जनाएको छ । मन्त्रालयका अनुसार २४ कात्तिकमा ६ जना कोरोना संक्रमितको मृत्यु भएको छ ।
सोमबारसम्म प्रदेश १ मा कोरोना संक्रमितको संख्या २२ हजार एक सय ९८ पुगेको छ । तीमध्ये २४५ जनाको मृत्यु भएको छ । १४ हजार आठ सय एकजना संक्रमण मुक्त भएका छन् । दसैँपछि संक्रमणदर बढ्दो क्रममा छ ।
मन्त्रालयका अनुसार १६ कात्तिकसम्म प्रदेश १ मा कोभिड १९ बाट १ सय ८७ को ज्यान गएको थियो । त्यो संख्या कात्तिक २३ पुग्दा बढेर २ सय ३९ पुग्यो । सोमबारसम्म २४५ पुगेको छ ।
आसोज २४ सम्म प्रदेश १ मा जम्मा ९६ जनाले कोरोना भाइरस संक्रमणको कारण ज्यान गुमाएको मुख्यमन्त्री तथा मन्त्रिपरिषद कार्यालयको तथ्याङ्कमा उल्लेख छ । गएको दसैँले संक्रमण फैलाउन राम्रै भूमिका खेलेको तथ्याङ्कले देखाउँछ ।
कात्तिक ५ गतेसम्म १ सय ५१ जनाको मृत्यु भएको प्रदेश १ मा १० गतेसम्ममा १ सय ७१ पुगेको थियो । त्यसयताको तथ्याङ्कले संक्रमणसँगै ज्यान जाने क्रमले तीव्रता लिएको देखाउँछ ।
पछिल्लो समय संक्रमण बढ्दो छ । मानिसले परीक्षण नगर्ने र अवस्था जटिल देखिएपछि मात्र परीक्षण गर्ने बानीले गर्दा संक्रमित र मृतकको संख्या बढाउँदै लगेको हो ।
Copyright © 2019 / 2026 - Junkirikhabar.com All rights reserved
