इटहरी उपमहानगरपालिकाले बजार तथा होटल अनुगमनलाई तीब्रता दिएको छ ।
उपभोक्तालाई व्यापारीहरुले ठग्ने, कालोबवारी गर्ने जस्ता कुरा उठिरहेकाले अनुमगनलाई तीब्रता दिएको उपमहानगरपालिकाले जनाएको छ ।
खाद्य प्रविधि तथा गुण नियन्त्रण डिभिजन कार्यालयसँगको सहयोगमा यहाँ सञ्चालित होटलहरुको अनुगमन सुरु गरेको हो ।
खाद्य प्रविधिले निश्चित निर्देशिका बनाएर होटल तथा रेष्टुरेन्टहरुको अनुगमन सुरु गरेको खाद्य प्रविधि तथा गुण नियन्त्रण डिभिजन कार्यालयका प्रमुख काशिनाथ घिमिरेले जानकारी दिए ।
उनले खाद्य स्वच्छताको आधारमा होटलहरुलाई चार वर्गमा विभाजन गरिएको बताए । घिमिरेका अनुसार अतिउत्तमलाई ‘क’ वर्ग, उत्तमलाई ‘ख’ वर्ग, सन्तोषजनकलाई ‘ग’ वर्ग र सामान्य तथा सुधार गर्नुपर्नेलाई ‘घ’ वर्गमा राखिने छ ।
उनले आइतबार र सोमबार इटहरीका सम्पूर्ण होटलको अनुगमन गरिने र होटललाई स्वच्छताका आधारमा वर्गीकरण गरिने बताए ।
Copyright © 2019 / 2026 - Junkirikhabar.com All rights reserved
