इटहरी खानेपानी उपभोक्ता संस्थाले आफ्नो नयाँ प्रशासनिक भवनको शनिवार उद्घाटन गरेको छ ।
प्रदेश १ का मुख्यमन्त्री शेरधन राई को प्रमुख आतिथ्यमा इटहरी ४ पानी ट्याङ्कीमा सो भवनको उद्घाटन गर्नुभयो । एक वर्ष पहिल्यै तयार भइसकेको भवन कोरोना महामारीका कारण ढिला भइ उद्घाटन भएको हो । ७० प्रतिशत नेपाल सरकारको लगानी र ३० प्रतिशत खानेपानी उपभोक्ताको लगानीमा भवन निर्माण भएको हो ।
भवनको उद्घाटन गदै मुख्यमन्त्री राईले इटहरी खानेपानी उपभोक्ता संस्थाको भवन निर्माणले यहाँको सेवा र सुविधा थप हुने विश्वास व्यक्त गर्नुभयो । साथै संस्थाले इटहरीका जनतालाई दिँदै आएको पानी थप स्वच्छ र सेवा अवधि बढाउने कुरामा राईले जोड दिनुभयो ।
साथै मुख्यमन्त्री राईले प्रदेश सरकार आएपश्चात् जनताका आधारभूत सेवा सुविधा उपलब्ध गराउने कार्यमा प्रदेश १ सरकार गम्भीर भएर लागेको र परिणाम देखिन थालेको बताउनुभयो । सङ्घीयताले जनतालाई सुविधा दिएको वहाँको भनाई थियो ।
कार्यक्रममा इटहरी खानेपानी उपभोक्ता संस्थाका अध्यक्ष रामप्रसाद चौलागाईले संस्थाको थप कार्य योजना अनुसार इटहरीवासीलाई खानेपानी सुविधा बढाउँदै लाने योजना रहेको बताउनुभयो । खानेपानीको धारा जडान बढाउने र शुल्कलाई समेत समायोजन गदै संस्थाले थप कार्यक्रमहरू ल्याउन लागेको जानकारी दिनुभयो ।
कार्यक्रममा प्रदेश सांसद सर्वध्वज साँवा लगायत अतिथिहरूले संस्थाको कार्य प्रति शुभकामना व्यक्त गर्नुभएको थियो ।
