भूमि व्यवस्था कृषि तथा सहकारी मन्त्री शिवमाया तुम्बाहाम्फेले इटहरीमा भूमिहीन सुकुम्वासीको लगत सङ्कलन कार्यको निरीक्षण गर्नुभएको छ ।
इटहरी उपमहानगरपालिकाको वडा नम्बर ९ लालिगुरास टोलमा आयोगका पदाधिकारी स्थानीय जनप्रतिनिधि सहितको टोलीले अनुगमन गरेको हो । अनुगमनका क्रममा झुटा विवरण नटिपाउन मन्त्री तुम्बाहाम्फेले आग्रह गर्नुभएको छ । साथै तोकिएकै समयमा इटहरीका सबै भूमिहीन सुकुम्वासी भूमिहीन दलित र अव्यवस्थित वसोवासको लगत सङ्कलन गर्न कर्मचारीलाई निर्देशन समेत दिनुभयो ।
बिहीबार देखी इटहरी उप महानगरपालिकाले सुरु गरेको लगत सङ्कलनमा भूमिहीन सुकुम्वासी र भूमिहीन दलितलाई जग्गा उपलब्ध गराउन र अव्यवस्थित वसोवासलाई व्यवस्थित गर्न टोल टोलमा लगत सङ्कलन भइरहेको छ । इटहरीमा बिहीबार देखी २० वटै वडाका टोल टोलमा लगत सङ्कलन सुरु भएको छ । लगत सङ्कलनका लागि २५ जना कर्मचारी खटाइएको उपमहानगरपालिकाले जनाएको छ । ठुला ५ वटा वडामा दुई दुई जना र अन्य वडामा एक एक जनाका दरले कर्मचारी लगत सङ्कलनको लागि परिचालित भएको इटहरी उपमहानगरपालिकाकी उपप्रमुख लक्ष्मी गौतमले जानकारी दिनुभयो । वैशाख महिना भित्रमा इटहरीका सबै भूमिहीन सुकुम्वासी भूमिहीन दलित र अव्यवस्थित वसोवासीको लगत सङ्कलन गरी सक्ने तयारी उपमहानगरपालिकाको छ ।
