इटहरीको मुख्यचौक आसपासमा सरसफाइ गरेर सामाजिक चर्चा र प्रसंशा कमाएको बुल्स इलेभेन क्लबले इटहरी रंगशालाको सरसफाइ सुरु गरेको छ ।
क्लबले प्रत्येक शनिबार सरसफाइ गर्ने अभियान अन्तर्गत शनिबार बिहानबाट झाडीले भरिएको रंगशालाको सरसफाइ सुरु गरिएको क्लबका अध्यक्ष पूर्ण राइले बताउनुभयो । सरसफाइ अभियानमा सक्रिय रहेका दुइ दर्जन युवाहरुको समुहले इटहरी रंगशालाको एथलेटिक्स टयाक आसपासको झारपात उखलेर सफाई थालेका हुन । लामो समय खेलकुदको गतिबिधि नभएपछी उक्त रंगशाला झाडीमा परिणत भएको छ ।
पूरै रंगशालाको झार सफागर्न एक महिना भन्दा बढी समय लाग्ने राइले जानकारी दिनुभयो । करोडौको लगानीमा निर्माण गरिएको रंगशाला झाडीमा परिणत हुदा समेत प्रदेश तथा स्थानिय सरकार तथा खेलकुदका निकायले बेवस्ता गरेकाले आफूहरुले सरसफाइ अभियानको थालनी गरेको बुल्स इलेभेन क्लबका अध्यक्ष राई बताउनुहुन्छ ।
यस्तै सरसफाइ अभियानमा सहभागीले पनि इटहरीको गौरब मानिएको रंगशाला व्यवस्थापनमा राम्रो काम नभएको बताएका छन् ।
यसअघि अघिल्लो शनिबार क्लबले इटहरीको मुुख्य बजारको गोलो चोकमा रहेको बगैंचा अर्थात पूर्व पश्चिम राजमार्ग र कोशी राजमार्गको दिशा छुुट्याउने संरचनाको सफाई गरेर आकर्षक बनाएका थिए । यस्तै क्लबले मुख्यचौक पश्चिम लाइनको बगैचाको पनि सरसफाइ गरेका थिए ।
Copyright © 2019 / 2026 - Junkirikhabar.com All rights reserved
