खेतीपातिको मौसममा मोरङका किसानहरुले महंगोमा डिएपी मल किन्नु परिरहेको छ । धान रोप्नु अघि डिएपी मल छरेर धान रोप्ने गरेकोमा मल ढिलो आएपछि उनीहरुले धान रोपिसकेपछि महंगोमा मल किनेर छरिरहेका छन् । यति वेला साल्ट्र ट्रेडिङ कर्पोरेशनले ५ हजार मेट्रिक टन डिएपी मल ल्याएपछि कृषकहरुले मल पाउन थालेका हुन् ।
साल्ट्र ट्रेडिङ कर्पोरेशनले ल्याएको मल सहकारी संस्थाहरु मार्फत गाँउ गाँउमा किसानहरुलाई विक्री गर्दै आएको छ । सहकारीहरुले पर्याप्त मल नभएको भन्दै प्रति किलो ५० रुपैयाँमा डिएपी मल बेच्दै आएको किसानहरुले गुनासो गरेका छन् । तर सहकारीहरुले भने तोकेको मूल्य भन्दा बढी किसानसंग मूल्य नलिएको दावी गर्दै आएका छन् ।
साल्ट ट्रेडिङ कर्पोरेशन विराटनगरले सहकारीलाई ५० किलोको डिएपी मल प्रति बोरा २ हजार १ सय ५० रुपैयाँमा बेच्ने गरेको छ । सहकारीले भने ढुवानी भाडा जोडेर प्रति बोरा २ हजार २ सय ५० रुपैयाँ सम्ममा बेच्नुपर्नेमा खुला र विक्री भन्दै २ हजार ५ सय रुपैयाँ प्रति बोरा सम्ममा बेच्ने गरेको पाइएको छ । स्थानीय निकायले तोकेको मूल्य भन्दै सहकारीले मलको मूल्य तोकेर बेच्ने गरेको पाइयो ।
Copyright © 2019 / 2026 - Junkirikhabar.com All rights reserved
