बाह्रौँ संस्करणको अन्तर्राष्ट्रिय आमन्त्रण इटहरी गोल्ड कप फुटबल प्रतियोगिता चैत्र १९ देखी २६ गतेसम्म हुने भएको छ । कोरोना भाइरस सङ्क्रमणको कारण विगत दुई वर्ष प्रतियोगिता हुन नसकेको गोल्ड कप यस पटक विशेष किसिमले गर्न लागिएको आयोजकले इटहरीमा पत्रकार सम्मेलन गरि जानकारी दिइएको छ । यस पटक भने इटहरी गोल्ड कप दर्शकले भिआइपी प्याराफिटमा बसेर हेर्न पाउने भएका छन् ।
रङ्गशालामा यसअघि सिमेन्टको प्याराफिट भए पनि पर्याप्त दर्शक बस्न नपाउँदा समस्या हुने गरेको थियो । यस पटक भने सहज रूपमा ८ हजारको सङ्ख्यामा दर्शकहरूले सुविधा सम्पन्न प्याराफिटमा बसेर खेलको मज्जा लिन पाउनेछन् । आयोजक राष्ट्रिय जागृति क्लबले पत्रकार सम्मेलन गरी चैत्र १९ देखी २६ गतेसम्म हुने प्रतियोगिताको तयारी अन्तिम चरणमा पुगेको समेत जानकारी दिइएको छ ।
इटहरी रङ्गशालामा हुने प्रतियोगितामा दुई विदेशी सहित ८ टिमले सहभागी जनाउने गोल्ड कप संयोजक अनुरोध थापाले जानकारी दिए । जसमध्ये मनाङ मर्स्याङ्दी क्लब काठमाडौँ, नेपाल आर्मी क्लब काठमाडौँ, झापा ११, मोरङ ११, आयोजक राष्ट्रिय जागृति क्लब, न्यूरोड टिम काठमाडौँ, एभिनियर फुटबल क्लब क्यामरुन, कन्चनजंगा फुटबल क्लब भारत रहेका छन् । कुल ५४ लाख लागत लाग्ने अनुमान गरिएको प्रतियोगिताको विजेताले ७ लाख पाउनेछन् भने उपविजेताले ३ लाख पचास हजार पाउनेछ ।
यस्तै उत्कृष्ट खेलाडीले यमाहाको स्कुटर र उदयीमान खेलाडीले ४० इन्चको एलइडी टिभी पाउने आयोजकले जनाएको छ ।
Copyright © 2019 / 2026 - Junkirikhabar.com All rights reserved
