इटहरीस्थित फेव नेपालको कार्यालयमा चोरी भएको छ । इटहरी ९ स्थित विराटनगर लाइनमा रहेको कार्यालयमा आइतबार बिहान १ बजेको समयमा लाखौँ मूल्यको सामान र नगद चोरी भएको हो । कार्यालयबाट ल्यापटप २ थान, ३२ इन्चको मनिटर १ थान, ड्रिल मेशिन ३ थान, कटर मेशिन १ थान, वल्डीङ वायर २ सेट र नगद ५५ हजार चोरी भएको फेव नेपालका प्रबन्धक वीरेन्द्र चौधरीले जानकारी दिए ।
चौधरीले आइतबार नै इलाका प्रहरी कार्यालय इटहरीमा चोरीमा संलग्न र चोरी भएका सामानको खोजतलासको लागि उजुरी दिएका छन् । इटहरीमा पछिल्लो समय चोरीका घटना दैनिक वृद्धि भइरहेको जनाइएको छ । चोरीका घटना बढेपछि रातको समयमा स्थानीयहरू त्रसित हुने गरेको अवस्था छ । फेव नेपालको कार्यालयमा डिजिटल विज्ञापनहरूको बोर्ड बनाउनुको साथै होडिङ विज्ञापनको एजेन्सी सम्पर्क कार्यालय अवस्थित छ ।
