इटहरीमा मेयर र कार्यपालिका सदस्यबीच किचलो बढ्दै गएको छ । कर समायोजनको विषयलाई लिएर इटहरीका मेयर हेमकर्ण पौडेल र कार्यपालिका सदस्यबीच किचलो बढ्दै गएको हो ।
बिहीबार बोलाइएको बैठक कार्यसूचीमा प्रवेश नै नगरी स्थगित गरिएको भन्दै इटहरीमा नेकपा एमालेले असन्तुष्ट जनाएको छ । नेकपा एमाले इटहरी नगर कार्यपालिका सदस्यहरूले कार्तिक १२ गतेभित्र कार्यपालिका बैठक राख्न माग गरेका छन् ।
मेयर पौडेललाई सम्बोधन गर्दै लेखिएको पत्रमा १६ जना कार्यपालिका सदस्यहरूले हस्ताक्षर गरेका छन् । इटहरीमा एमालेको बहुमत छ । तर, मेयर पौडेलले कर समायोजन गर्नका निम्ति चासो नदेखाएको र गत बिहीबार बोलाइएको बैठकमा प्रवेश नै नगरी स्थगित गरिएको भन्दै एमाले थप असन्तुष्ट बनेको हो ।
स्थानीय सरकार सञ्चालन ऐनमा महिनामा कम्तिमा एक पटक कार्यपालिका बैठक राख्नुपर्ने व्यवस्था रहेकोमा २ महिना भन्दा बढी समयसम्म बैठक नबोलाएको आरोपसमेत लगाइएको छ ।
विजया दशमीको विदा सकिने दिन कात्तिक १० गतेका मितिले ४८ घण्टाभित्र कार्यपालिकाको बैठक राख्न माग गरिएको छ ।
Copyright © 2019 / 2026 - Junkirikhabar.com All rights reserved
