इटहरी खानेपानी उपभोक्ता संस्थाको नयाँ कार्यसमिति चयनमा नेकपा एमालेले अन्य दलसँग तालमेल नगर्ने भएको छ । एमाले र नेपाली काँग्रेस बिचमा भागबन्डाको विषय बाहिर आएपछि एमालेले भागबन्डा नगर्ने बताएको हो ।
नगर अध्यक्ष यामकुमार सुब्बाले कुनै तालमेलको सहमति नभएको बताउँदै अवस्था हेरेर अगाडि बढ्न वडा कमिटीलाई निर्देशन दिइएको बताए । यसअघि कार्यवाहक अध्यक्ष रुपेश बस्नेतको अध्यक्षतामा बसेको बैठकले फाल्गुन ६ गते वडा कमिटीलाई सर्कुलर जारी गरेको थियो ।
सोही सर्कुलरमा वडा स्तरमा हुने निर्वाचनको उम्मेदवार वडा कमिटीले तय गर्ने उल्लेख छ । टोल कमिटीको समेत सहभागिता रहने गरी उम्मेदवारी छनौट गर्नुपर्ने सर्कुलरमा बताइएको छ ।
जात, भूगोल तथा समुदाय मिलाएर सर्वसम्मत उम्मेदवार छनौट गर्नुपर्ने एमालेले निर्देशन दिएको छ । गठबन्धन गर्नुपर्ने भए प्रमुख प्रतिस्पर्धी बाहेक अन्य दलसँग वडाको अवस्था हेरेर तालमेल गर्नुपर्ने भएको छ ।
सोही निर्देशनलाई कार्यान्वयन गर्ने पछिल्लो अवस्था बारे बुझ्न सोमबार एमाले नगर पार्टी कार्यालयमा छलफल भएको हो । छलफलमा काँग्रेस लगायत दलसँग तालमेल नगर्ने सुझाव आएको अध्यक्ष सुब्बाको भनाइ छ ।
उता इटहरी उपमहानगरपालिकाका मेयर हेमकर्ण पौडेलले सर्वसम्मत खानेपानीको नेतृत्व चयन गर्न लबिङ गर्दै आएका छन् । सोही क्रममा काँग्रेस उपमहानगर सभापति समेत रहेका पौडेलले आइतबार मेयर कक्षमा सर्वदलीय छलफल गरेका हुन् । छलफलमा कुनैपनी भागबन्डा र तालमेलको सहमति नभएको एमाले अध्यक्ष सुब्बाले जानकारी दिएका छन् ।
Copyright © 2019 / 2026 - Junkirikhabar.com All rights reserved
