समालोचक डा. राम्जी तिम्सिनाको फोनको अन्तिम लोकेसन क्षेत्र वराहक्षेत्रमा ‘व्यापक खोजी’ जारी छ ।
सुनसरीको वराहक्षेत्रमा जल समाधि लिँदै छु भन्ने प्रकृतिको चिर्कटो छाडेर बुधबार बिहानैबाट बेपत्ता भएका उनको फोनको अन्तिम लोकेसन वराहक्षेत्र मन्दिर क्षेत्र रहेको छ । उनको फोन बेपत्ता भएयतादेखि नै नियमित लागिरहेको छ । वराहक्षेत्र मन्दिर क्षेत्रमा अहिले उनको परिवार तथा आफन्तले पनि व्यापक खोजी गरिरहेको छ । त्यस्तै प्रहरी पनि खोजी कार्यमा लागेको जिल्ला प्रहरी कार्यालय सुनसरीका प्रमुख एसपी विपीन रेग्मीले जानकारी दिए ।
‘हाम्रोतर्फबाट पनि खोजी भइरहेको छ । परिवारको तर्फबाट पनि व्यापक खोजी भइरहेको छ । लोकेसन फाइन्डिङ भएको ठाउँमा खोजिरहेका छौँ’ उनले फोनसम्पर्कमा भने ।
उनका शुभचिन्तकहरूले उनी बेपत्ता भएकोमा चिन्ता व्यक्त गरेका छन् ।
उनलाई जान्ने जानकारहरूका अनुसार भने घरपरिवारमा बेमेल रहेको थियो । लामो समयदेखि नै बेमेल रहेका कारण उनी समस्यामा रहेको जानकारहरू बताउँछन् । भाषाविद् प्रा.डा. टङ्क न्यौपानेले पारिवारिक रूपमा त्यति धेरै राम्रो नभएको भन्ने विगतदेखि नै सुन्नमा आएको बताए । उनले जल समाधि लिनुपर्ने अवस्था के कारणले आएको हो भन्ने चाहिँ अहिलेसम्म खुल्न सकेको छैन ।
Copyright © 2019 / 2026 - Junkirikhabar.com All rights reserved
