सुनसरीको क्षेत्रीय कारागार झुम्काबाट १२ वर्षअघि सुरुङ खनेर फरार भएका कर्तव्य ज्यान मुद्दाका दोषीलाई प्रहरीले पक्राउ गरेको छ । पक्राउ पर्नेमा इनरुवा नगरपालिका १० वलाहाका चन्द्रशेखर भनिने विनायककुमार यादव रहेका छन् । जेलबाट दुई पटक भागेका यादवलाई प्रहरीले शुक्रवार बिहान पत्रकार सम्मेलन मार्फत सार्वजनिक गरेको छ ।
अदालतको फैसलापछि थुनामा रहेका उनी सहित १२ जना कैदी २०६९ साल कात्तिक २३ गते राति झुम्का कारागारबाट सुरुङ खनेर फरार भएका थिए । उनलाई पक्राउ गर्न प्रहरीले एक राउन्ड गोली चलाएको जिल्ला प्रहरी कार्यालय सुनसरीका प्रहरी नायब उपरीक्षक रामप्रसाद तिमल्सिनाले जानकारी दिए ।
२०६५ साल वैशाख १६ गते सुनसरी साबिक प्रकाशपुर- ६ का ३९ वर्षीय केशव कार्कीको विनायक र श्याम भन्ने श्यामकुमार यादवले गोली हानी हत्या गरेका थिए । सो घटनामा संलग्न भएका विनायक एक थान पेस्तोल र ११ राउन्ड गोली सहित पक्राउ परेका थिए ।
जिल्ला अदालत सुनसरीले उनलाई २० वर्ष ८ महिना १४ दिन कैदको फैसला सुनाएको थियो । झुम्का कारागारबाट फरार भएका यादवलार्ई प्रहरीले सप्तरीको गोबरगाड़ाबाट पक्राउ गरी सिन्धुपाल्चोक कारागारमा कैद भुक्तानीको लागी पठाएको थियो । त्याहाबाट पनि उनी २०७२ वैशाख १२ गते भूकम्प आएका बेला भागेका थिए ।
तत्कालीन भूमिगत सङ्गठन मधेसी मुक्ति टाइगरमा समेत आबद्ध रहेका उनी सिन्धुपाल्चोकबाट भागेपछि भारतको विभिन्न स्थानमा लुकिछिपी बस्दै आएका थिए । बेलाबेला नेपाल आउने यादवलाई बिहीबार साँझ छठ पूजा मनाउँदै गरेको अवस्थामा सुनसरीको कोसी गाउँपालिका- ८ स्थित पथरचट्टान भन्ने ठाउँबाट पक्राउ गरेको तिमल्सिनाले बताए ।
प्रहरीलाई देखेपछि भाग्न खोजेका यादवलाई प्रहरीले गोली चलाएको थियो । भाग्न खोजेपछि घुँडामुनि एक राउन्ड फायर गर्दा उनी आत्तिएर लडेका थिए । उनलाई गोली भने नलागेको प्रहरीको भनाई छ ।
यादवलाई बाँकी सजाय भुक्तानका लागि शुक्रबारनै कारागार चलान गरेको तिमल्सिनाले बताए ।
