सुनसरीको विभिन्न तीन स्थानमा बिहान फेला परेको शङ्कास्पद बस्तु लाई नेपाली सेनाको टोलीले डिस्पोज गरेको छ । इटहरी उपमहानगरपालिका कार्यालयको प्रवेशद्वार, सुनसरी मोरङको सिमाना पर्ने बुढी खोलाको पुलमुनि र धरानको भोटे पुल नजिकै शङ्कास्पद बस्तु फेला परेको थियो । तर फेला परेको सबै बस्तु विस्फोटक पदार्थ नभएको सेनाले जनाएको छ । त्रास फैलाउने हिसाबले मात्र प्रेसर कुकर भित्र कागजको खोलहरू भरेर कालो झोला राखिएको प्रहरीले जनाएको छ । बुढी खोला र धरानको सेउती खोलमा भने कपडाको बोरा मात्र भएको जिल्ला प्रहरी कार्यालय सुनसरीका प्रहरी प्रमुख सुमन तिम्सिनाले जानकारी दिए ।
शङ्कास्पद बस्तु फेला परेको स्थानमा राष्ट्रिय सुरक्षा दल नेपालको प्रचार भेटिएको छ । प्रचारमा संवैधानिक राजसंस्था र प्रत्यक्ष निर्वाचित कार्यकारी प्रधानमन्त्री, वैदिक सनातन हिन्दुराष्ट र सङ्घीयता खारेजको माग समावेश छन् ।
सुनसरी प्रहरीका अनुसार शङ्कास्पद बस्तु राखेको भनेर प्रहरीले बोक्ने सञ्चारको मोबाइलमा म्यासेज आएको थियो । म्यासेज गर्ने व्यक्ति र बम राख्ने समूहको अनुसन्धानमा प्रहरी जुटेको जनाइएको छ ।
