भारतले विवादास्पद सप्तकोशी उच्च बाँध निर्माण प्रकृया अघि बढाएको भन्दै पीडितहरूले बाँध निर्माणको काम रोक्न प्रमुख जिल्ला अधिकारीलाई ज्ञापन पत्र बुझाएका छन ।
सप्तकोशी उच्च बाँध निर्माण आयोजना खारेजीको माग गर्दै संघर्ष समितिले धनकुटाका प्रमुख जिल्ला अधिकारी टुवराज पोख्रेललाई ज्ञापनपत्र बुझाएको हो ।
सप्तकोशी उच्च बाँध विरुद्ध संघर्ष समिति (माथिल्लो तटिय डुवान क्षेत्र)ले प्रस्तावित बाँध निर्माणले स्थानीय समुदाय बाध्यात्मक विस्थापनमा पर्ने र अस्थित्व माथिनै खतरा उत्पन्न हुने भन्दै प्रमुख जिल्ला अधिकारीमार्फत् सरकारको ध्यानाकर्षण गराएको हो ।
संघर्ष समितिले परियोजना स्थल वरिपरिका प्रभावितहरूको बासस्थान, खेती र आजिविका नै मासिने चिन्ता गरेका छन । किराँतहरूको आस्थाको केन्द्र खुवालुङ डुवानमा पर्ने भएकाले परियोजना बन्द गर्नुपर्ने माग राखेका छन ।
असिम राई नेतृत्वमा सप्तकोशी उच्च बाँध परियोजनाको प्रभाव मूल्याङ्कन प्रभावकारी हुनु पर्ने, प्रभावित समुदायको पूर्व स्वीकृती अनिवार्य हुनुपर्ने, वैकल्पिक, दिगो, स्थानीय र जनअनुकुल विकासका विकल्पहरू अघि सारिनु पर्ने माग राखेको छ ।
संघर्ष समितिका अध्यक्ष असिम राईले सप्तकोशी उच्च बाँधका कारण लाखौं नागरिक बाध्यात्मक विस्थापनमा पर्ने भन्दै उक्त परियोजनाले नेपाल र नेपाली हित नगर्ने बताउनुभयो ।
प्रस्तावित सप्तकोशी उच्च बाँध स्थल धनकुटा, भोजपुर, सुनसरी र उदयपुर जिल्लाको सीमावर्ती कोशी गल्छीमा पर्छ । तत्कालिन प्रधानमन्त्री गिरिजाप्रसाद कोइरालाको भारत भ्रमणका बेला २०४८ सालमा धनकुटा, भोजपुर, सुनसरी र उदयपुरको सीमावर्ती कोशी गल्छीमा बाँध हाल्न अध्ययन गर्ने सहमति भएको बताइन्छ ।
त्यसयता विवाद र चर्चामा रहेको सप्तकोशी उच्च बाँध निर्माण हुन नहुने भन्दै स्थानीयले बिरोध गर्दै आएका छन । सप्तकोशी नदीको पानीबाट तीन हजार मेगावाट बिजुली निकाल्ने, आसपासमा सिंचाइका लागि ठूला परियोजना संचालन गर्ने तथा भारतसागको जलमार्ग निर्माण गर्ने लगायतका महत्वकाक्षी योजना छन ।
Copyright © 2019 / 2026 - Junkirikhabar.com All rights reserved
