बैंक तथा वित्तिय संस्थाबाट ऋण लिएर नतिर्ने ऋणीको संख्या एकवर्षमै दोब्बरले बढेको छ । ऋण लिई भाका नाघेको ९० दिन भित्र ऋण नतिर्दा २०७५/०७६ मा मात्रै अघिल्लो वर्षभन्दा १५ सय ७ जना भन्दा बढी कालो सुचिमा परेका छन् । बैंकहरुमा कालोसुचिको संख्या बढेसँगै खराब कर्जा ६८ अर्ब ८० करोड रुपैयाँ पुगेको छ ।
कर्जा सुचना केन्द्रका अनुसार पछिल्लो एकवर्षमा चेक बाउन्सको घटना ह्वातै बढेकाले कालो सुचिमा पर्ने ऋणी संख्या समेत बढेको छ । पछिल्लो समय लागु भएको क्रेडिट कार्ड लिएर ३ महिना भित्र ऋण चुत्ता नगरे कालो सुचिमा राख्ने व्यवस्थाले यस वर्ष कालो सुचिमा पर्नेको संख्या झनै बढ्ने केन्द्रले जनाएको छ ।
आर्थिक वर्ष २०७५/०७६ मा अघिल्लो आर्थिक वर्षभन्दा १५ सय ७ जना थपिएर २८ सय ४२ जना ऋणीहरु कालो सुचिमा परेका छन् ।
कालो सुचिमा पर्नेको संख्या बढेसँगै हट्नेको संख्या पनि बढ्दो छ । केन्द्रका अनुसार आर्थिक वर्ष २०७५/०७६ मा ६ सय २८ जना कालो सुचिबाट हटेका छन् । जुन आर्थिक वर्ष २०७३/०७४ मा ३ सय ४१ जना मात्रै ऋणीहरु कालो सुचिबाट बाहिर निष्कन सकेका थिए । यस सँगै, बैंकहरुले १ वर्षसम्म भाका राखी असुल गर्ने खराब कर्जा समेत राष्ट्रिय वाणिज्य बैंक र कृषि विकास बैंकले बाहेक अन्यले घटाउन सकेका छैनन । ऋणीहरुले ऋण नतिर्दा खराब कर्जा ६८ अर्ब ८० करोड रुपैयाँ पुगेको छ । समग्रमा गत वर्ष १ दशमलव ४५ प्रतिशतले खराब कर्जा बढेको छ । अन्य भन्दा कृषि विकास बैंकले गत वर्षभन्दा शुन्य दशमलव ५१ प्रतिशत खराब कर्जा असुल गरेको छ । गत वर्ष बैंकको कालो सुचिमा ५० जना ऋणीहरु परेका छन ।
Copyright © 2019 / 2026 - Junkirikhabar.com All rights reserved
