पर्वमा बेला मासु व्यवसायीले खसी मासुको मूल्य आफूखुसी वृद्धि गर्दै आएका छन् । सरोकारवाला निकायले चासो नदिँदा उपभोक्ता मर्कामा परेका छन् । मासु व्यवसायीले गत फागु पूर्णिमामा खसीको मासुमा प्रतिकेजी ५० रुपैयाँ बढाएका थिए ।
त्यस लगत्तै नयाँ वर्षमा प्रतिकिलो थप ५० रुपैयाँ मूल्य वृद्धि गरे । तर सरोकारवाला निकायले केही गरेन ।
दसैको नाममा उनीहरूले आइतबारदेखि प्रति केजी डेढसय रुपैयाँ बढाउँदा पनि सरोकारवाला निकायले वास्ता गरेको छैन । शनिबार साँझसम्म प्रति किलो ८ सय ५० रुपैयाँमा मासु बिक्री गर्दै आएका उनीहरूले आइतबारदेखि प्रति किलो १ हजार बनाएका हुन् ।
‘दसैंले गर्दा जिउँदो खसी किन्दा नै महंगो पर्न थाल्यो,’ व्यवसायी मोहनले भने आफ्नै खरिदमा बढी परेपछि मासुको दाम स्वतः बढेको हो ।’ बजारको अनुगमन जिल्ला प्रशासन कार्यालयको नेतृत्वमा वाणिज्य कार्यालयले र महानगरपालिकाले वेग्लाबेग्लै गर्दै आएका छन् । दुवै निकायले एकअर्कोलाई देखाउँदै जिम्मेवारीबाट पन्छिने गरेका छन् ।
महानगरकाको अनुगमन टोलीका नन्दी भण्डारीका अनुसार प्रजिअको निर्देशनमा वाणिज्य कार्यालयले बजार अनुगमन गरिरहेको छ । अगाडि–अगाडि वाणिज्य कार्यालयको अनुगमन टोली र पछिपछि महानगरको टोली पुग्दा व्यवसायीलाई हैरानी हुने स्थिति आएकाले वाणिज्य कार्यालयको अनुगमनलाई महानगरले सपोर्ट गर्दै आएको बताए । उनका अनुसार वाणिज्य कार्यालयको टोली बजार ननिस्कँदा महानगरको टोली अनुगमनमा निस्कने गरेको छ ।
Copyright © 2019 / 2026 - Junkirikhabar.com All rights reserved
