अमेरिकी फौजी किराको प्रकोपले प्रदेश १ मा कृषकले दुईहजार सातसय हेक्टरभन्दा बढी क्षेत्रमा लगाएको मकैबाली सखाप भएको छ । किराले प्रदेशका १० हजार ६७८ परिवारले दुई हजार ७१० हेक्टरमा लगाएको मकैबाली सखाप पारेको हो ।
गत जेठ २२ गते तेह्रथुमको म्याङ्लुङ नगरपालिका र धनकुटाको पाख्रीबास नगरपालिकामा पहिलो पटक देखिएको फौजी किराको प्रकोप आठ जिल्लाका ३६ स्थानीय तहमा फैलिएको प्रदेश १ को कृषि विकास निर्देशनालय विराटनगरले जनाएको छ ।
भदौ अन्तिमसातासम्म देखिएको फौजी किराले पाँचथरमा सबैभन्दा बढी क्षति पुर्याएको छ । पाँचथरपछि ओखलढुंगा, भोजपुर, खोटाङ, धनकुटा, तेह्रथुम, उदयपुर र झापाका कृषक बढी प्रभावित छन् । कृषी बिकास निर्देशनालयका सूचना अधिकारी प्रकाशकुमार डाँगीका अनुसार, ओखलढुंगामा दुई हजार १८० कृषकले पाँचसय हेक्टरमा लगाएको मकै किराले नष्ट पारेको छ ।
त्यस्तै, उदयपुरमा १२९ कृषकले २२ हेक्टरमा लगाएको मकैबाली सखाप पारेको छ भने भोजपुरका ८०५ कृषकले २८९ हेक्टर र पाँचथरमा छ हजार ६३२ कृषकले एक हजार ३४५ हेक्टरमा लगाएको मकै किराले नष्ट गरेको छ । खोटाङमा ६६० कृषकले २२२ हेक्टर, धनकुटामा १८१ हेक्टर, तेह्रथुममा एकसय ४८ र झापामा ३ हेक्टर क्षेत्रमा लगाएको मकै बाली फौजी किराले सखाप बनाएको छ ।
फौजी किराको प्रकोप देखिएको स्थानका कृषकहरुलाई विषादी उपलब्ध गराएको सूचना अधिकारी डाँगीले बताए । उनका अनुसार, फौजी किराले धान, गहुँ, कोदो, उखु, गोलभेंडा, आलुलगायतका बाली पनि सखाप पार्न सक्छ ।
पहाडी क्षेत्रको मकैबालीमा देखिएको अमेरिकन फौजी किरा पछिल्लो समय नियन्त्रणमा आए पनि तराईमा लगाइने मकैबालीमा फैलन सक्ने खतरा रहेको निर्देशनालकी बाली संरक्षण अधिकृत सरस्वती श्रेष्ठ बताउँछिन् ।
तराई क्षेत्रमा हिउँदे मकैबाली लगाउने चलन छ । श्रेष्ठ भन्छिन्, ‘पहिले प्रकोप देखिएको स्थानमा दोस्रो पटक बाली लगाउँदा फौजी किरा देखिएको छैन, तर तराईमा हुने मकै खेतीमा देखिन सक्छ ।’
Copyright © 2019 / 2026 - Junkirikhabar.com All rights reserved
