कुटपिटको घटनामा जाहेरी दर्ता गर्न नमानेको विषयलाई लिएर पीडित पक्षले इनरुवामा पत्रकार सम्मेलन गरेको छ ।
हरिनगर गाउँपालिका ४ का सुनिल साहमाथि भएको कुटपिट पश्चात शिवनारायण मेहता, जोगेश्वर मेहता, गोविन्द मेहता, सन्तोष मेहता, अरविन्द मेहता, पवन मेहता, राजेश मेहता र मुकेश मेहतामाथि कारवाहीको माग गर्दै पीडित पक्ष प्रहरीमा उजुरी दिन पुगेका थिए ।
सुनसरी प्रहरीले कुटपिटको घटनालाई सामान्य भन्दै दोषी भनिएकाहरुमाथि कार्वाहीको प्रकृया अघि नबढाई मिलापत्रका लागि दबाब दिएपछि पीडित पक्षले इनरुवामा पत्रकार सम्मेलन गरि घटना सार्वजनिक गरेको हो ।
यो घटना कात्तिक १३ गतेको हो । छिमेकमा ठूलो साउण्डमा बजाइएको माइकको भोलुम घटाउने विषयमा विवाद पश्चात कुटपिट हुन पुगेको थियो ।
उक्त घटनामा सुनिल साह र सञ्जीव कुमार साह घाइते भएका थिए । घटनामा सुनिल साहको हात भाँचिएको छ । उनको हातमा स्टिल हालिएको छ ।
घटना पश्चात पीडक भनिएका पक्षले बिरामीलाई तत्कालै उपचार गर्न लैजान नदिएको पीडित पक्षको भनाइ छ । घटना सम्वन्धमा इलाका प्रहरी कार्यालय हरिनगरले समेत वेवास्ता गरेपछि सुनसरी प्रहरीमा मुद्दा दर्ता गराउन पुगेको थियो ।
पीडितलाई प्रहरीले इनरुवा अस्पतालबाट घाउजाँच गरी ल्याउन भनेपछि अस्पतालले सामान्य भनि लेखेको आधारमा मुद्दा दर्ता गर्न नमिल्ने भनि पन्छिएको प्रहरीले विपक्षीसँग मिलेर घटना दबाउन खोजेको घाइते सुनिल साहले बताए ।
प्रहरीले इनरुवा अस्पतालको रिपोर्टका आधारमा मुद्धा दर्ता गर्न नमानेपछि वीपी कोइराला स्वास्थ्य विज्ञान प्रतिष्ठानमा लगिएकोमा वीपीले समेत घटनालाई सामान्य भनेको थियो । प्रहरीले ती दुवै अस्पतालको रिपोर्टलाई आधार देखाउँदै दुर्घटनाबाट हात भाँचिएको हुनसक्ने भन्दै घटनालाई कुटपिटमा मुद्दा दर्ता गर्न नसकिने भनेर पीडितलाई मिलापत्र गर्न दबाब दिएको बताइएको छ ।
Copyright © 2019 / 2026 - Junkirikhabar.com All rights reserved
