मोरङको इलाका प्रहरी कार्यालय पथरीले १२ जना फरार प्रतिवादीलाई पक्राउ गरी एकै पटक अदालतमा बुझाएको छ । विभिन्न अपराधिक घटनामा अदालतले दोषी ठहर गर्दै कैद र जरिवानाको फैसला सुनाए पनि फरार रहेकालाई पक्राउ गरेको हो।तीन दिनको अवधिमा १२ जनालाई पक्राउ गरेर अदालतमा बुझाएको हो । इलाका प्रहरी कार्यालय पथरीका डीएसपी दिलिप गिरीले बहुविवाह, सवारी ज्यान, चोरी, लागुऔषधसमेतका मुद्दामा फरार रहेकालाई पक्राउ गरिएको हो । मोरङकै पथरीशनिश्चरे नगरपालिका र कानेपोखरी गाउँपालिका घर भएका सबैजनालाई शनिबार राति पक्राउ गरिएको गिरीको भनाइ छ।
पक्राउ पर्नेमा बहुविवाह मुद्दामा फरार रहेका पथरीशनिश्चरे ८ का ४५ वर्षीय चन्द्रबहादुर लुइँटेल, पथरीशनिश्चरे १० का ३५ वर्षीय बालकृष्ण श्रेष्ठ, ३० वर्षीय अर्जुन राई, ३२ वर्षीय नरमाया तामाङ, लागुऔषध मुद्दाका पथरीशनिश्चरे ८ का ६० वर्षीय लालबहादुर राई र पथरीशनिश्चरे ६ का ३५ वर्षीय बज्रमोहन यादव रहेका छन् ।
त्यस्तै, सवारी ज्यान मुद्दाका पथरीशनिश्चरे ६ का ३४ वर्षीय बले मुसहर, ५० वर्षीय गोपाल लुइँटेल, ४४ वर्षीय राजकुमार धिमाल, पथरीशनिश्चरे ८ का ४५ वर्षीय सोभित भुजेल, कानेपोखरी २ का ३५ वर्षीय फणिन्द्रबहादुर लिम्बू र चोरी मुद्धामा फरार पथरीशनिश्चरे ५ की ५५ वर्षीय मीना खड्कालाई पनि पक्राउ गरिएको डीएपपी गिरीले बताए ।
जिल्ला अदालत मोरङले चन्द्रबहादुरलाई २०७५ साल माघ २ गते एक वर्ष कैद र १० हजार जरिवाना, बालकृष्णलाई २०७५ जेठ ३१ गते एक वर्ष कैद र पाँच हजार रुपैयाँ जरिवाना, अर्जुन र उनकी कान्छी श्रीमती नरमायालाई जनही एक वर्ष कैद र पाँच हजार रुपैयाँ जरिवानाको फैसला गरेको थियो । गत जेठ १४ गते लालबहादुरलाई १० महिना कैद र बज्रमोहनलाई छ महिना कैद तथा दुई हजार रुपैयाँ जरिवानाको फैसला अदालतले सुनाएको थियो ।
Copyright © 2019 / 2026 - Junkirikhabar.com All rights reserved
