असार २०, २०७६
जुनकिरी खबर

मोटरसाइकल चोरीमा संलग्न सात पक्राउ

प्रहरीले जिल्लामा संगठित भएर मोटरसाइकल चोरी गर्दै आएका ७ अभियुक्तलाई पक्राउ गरी सार्वजनिक गरेको छ । उनीहरुको साथबाट १८ वटा चोरीका मोटरसाइकल समेत बरामद गरेको प्रहरीको दाबी छ ।

जिल्ला प्रहरी कार्यालय झापाले इलाका प्रहरी कार्यालय बिर्तामोडमा पत्रकार सम्मेलन गरी मोटरसाइकल चोरीमा संलग्न सात अभियुक्त सार्वजनिक गरेको हो । पक्राउ पर्नेहरुमा झापा गौरादह–२ का एलक्स भनिने विजय चौधरी, बाह्रदशी–६ का नगेन्द्र चौधरी, गौरादह–८ का रोविन राजवंशी, बाह्रदशी–७ का विनोद मुर्मु, कमल गाउँपालिका–१ का विष्णु चौधरी, शिवसताक्षी–१ का प्रेमबहादुर रिमाल, शिवसताक्षी–५ का रमेशकुमार ताजपुरिया रहेका छन् ।

पछिल्लो समय झापामा मोटरसाइकल चोरीका घटना बढेपछि जिल्ला प्रहरी कार्यालयले चलाएको बिषेश अप्रेशन अन्तर्गत झापाका विभिन्न स्थानबाट मोटरसाईकल चोरीमा संलग्न अभियुक्त र लुकाईछिपाई राखेको अवस्थामा मोटरसाइकल बरामद गरिएको जिल्ला प्रहरी कार्यालय झापाका प्रहरी नायव उपरीक्षक महेन्द्रकुमार श्रेष्ठले जानकारी दिए ।