लकडाउनको अटेर गर्दै घर बाहिर निस्केकाहरुलाई सडकबाटै नियन्त्रणमा लिई प्रहरीले दुई घण्टा कोरोना क्लास दिन थालेको छ ।
मर्निङवाक वा टहलिन निस्कने र रमिता हेर्न घसबाट बाहिरिनेहरुलाई नियन्त्रणमा लिई धरान–१२ चतरालाइनस्थित पव्लिक उच्च माविको मैदानमा दुई घण्टा राखेर कोरोना क्लासमा राखिने गरिएको छ । शुक्रबार साँझ सडकमा निस्केका १६० जनालाई नियन्त्रणमा लिई छाडेको प्रहरीले जनाएको छ ।
शनिबार बिहानमात्र मर्निङवाक गर्ने दुई सयभन्दा बढीलाई प्रहरीले नियन्त्रणमा लिई दुइ घण्टा क्लासमा सहभागी गराएको थियो । कोरोना त्रास सर्वत्र फैलिएको र हालसम्म एकलाख भन्दा बढीले ज्यान गुमाइसकेको र करिब १७ लाख संक्रमित भएको बेला कोरोना फैलने ‘चेन ग्याप’गर्न सरकारले लकडाउन गरेको छ ।
इलाका प्रहरी कार्यालय धरानका प्रहरी निरीक्षक हेमराज ओलीले नियन्त्रणमा लिइएका सर्वसाधारणलाई कोरोना भाइरसको कुनै औषधि अविष्कार नभएको, जोखिम बढेको र बच्ने उपायबारे पढाएर दुई घण्टापछि छाडिने गरेको बताए । उनका अनुसार लकडाउन उल्लङ्घन गर्दै सवारी साधन चलाउनेको साधन नियन्त्रणमा लिई लकडाउन पछि मात्रै फिर्ता गर्नेगरी जफत गर्न थालिएको छ ।
इलाका प्रहरी कार्यालय धरानका डीएसपी ढुण्डिराज न्यौपानेले भने, ‘सर्वसाधारण नागरिक कोरोनाबाट सुरक्षित रहुन् भनेर नै सरकारले लकडाउन घोषणा गरेको हो ।
Copyright © 2019 / 2026 - Junkirikhabar.com All rights reserved
